يـا دوا جرحي على هونك ترى
مـابقا بـالقلب شـيٍ ما يبيك
كـل جـرحٍ مـن لقانا لو برى
يشتكي لي من جروحٍ تشتكيك
لـو تـنام الـعين قلبي لك سرى
مـا يـنام الليل دامه مشتريك
والـمشاعر لـو بـغيتي تـنقرى
فـي عـيوني واضحة تشر عليك
لـو أحـبك لـو أقول اللي طرى
الـمحبه أكـبر مـن اللي تجيك
يـاهوى قـلبي وغـيري ما درى
ايه أحبك قبل ما أشوفك واجيك
لا تـحـسبيني بـسيط انـشرى
قـاسيٍ قـلبي بـحبه يـحتريك
انـتخا ثم اشـتقـابك واحترى
واغترب لك حزة انه مات فيك
مـانساها لـو جـرى له ما جرى
ضـحكة الطفله ولعبه في يديك
يـخفق لـحبك بصدقٍ ما افترى
يـنتظر سـاعة لـقاه بناظريك

2002م

تـستاهلين أحـلى القصايد يا منى
وأحلى خواطر تنكتب لك في سطور
وأحـلى هـديه في صباحة عرسنا
لـلي غـلاها زايـدٍ فوق الشعور
كـلي فـديتك لـو سألتي من أنا
جـرحٍ قـديمٍ واندفن بين العصور
كـلمة وتاهت في حروف بسطرنا
قطرة وضاعت بالشواطي والبحور
تـايه وجـيتك والـدروب تـلمّنا
طـاب اللقاء بك يابعد كل البدور
اهـلاً هـلا بـك يا مناتي والهنا
يـامن غديتي في حياتي كل نور
وردة حـياتي والـورود تـشمّنا
يـاوردةٍ فـاحت على كل الزهور
فـوحي عـلى قـلبٍ تعطر بالعنا
قـولي ولا تخفين في قلبك شعور

2002م

للطيب ناس وللردى ناس تبغاه
ولـلعز نـاسٍ مـاتحب المذله
احـدٍ يدل الطيب والطيب يلقاه
واحـدٍ دروب المرجلة ما تدله
كـلٍ جنى يا ناس من فعل يمناه
والـسيف ما كلٍ بوجهه تسله
جانا الكلام ومن لسانه سمعناه
ساكـت وتال الـوقت جانا بعله
يـاليتنا عن هرجته ما سألناه
الـطين زاده مـن كلامـه ببله
هو يحسبن الغير يـدمح خطاياه
مـا يدري اني حاسبٍ كـل زله
لولا الحياء والشايب اللي فقدناه
لاقـول بـاسمه بالقصيد وأدله
الشايب اللي بالمـراجل عرفناه
الطيب ساسه والكرم عادةٍ له
مرحوم يا شيخٍ على الطيب ملفاه
تـستاهل الدمع بغـيـابك نهله
والـلي تـكلم في قفانا عذرناه
دامـك ابـوه ومنزلك في محله
مرحوم ياللي ما نسينا عطاياه
قـلبٍ رحـوم وكل طيبٍ يدله

2002م

على طاري جروح العام
وش الـلـي ذكــرك فـيني
وش الـلي رجـعك بـهيام
وانـــت الــعـام نـاسـيـني
بـعد مـاصرت لـي أحلام
وبــان الـهـم فــي عـيـني
بـعـد مــا راحــت الأيـام
قــوا لـك عـين واتـجيني
غــديـت بـدنـيتي أوهــام
وحـــبٍ مـــات بـسـنـيني
تـجرعت الـهوى بـاسقام
واخـــذت الـلـي يـكـفيني
نـسيتك مـع جروح العام
وجــانـي مـــن يـسـلـيني

2002م

لي صــاحبٍ كل الحــلا في عــنــــاده
أرقـى هـــمـــوم الــوقـت ويـصــيـر ضدي
قال الــــغــــلا قلت الــغــــلا في زياده
وأكبر طموحي لا جلسـت انت عنـدي
قال الهـوى قلت استحي من بــراده
واكـتـم أحـاسـيـسـي ولو تــســتــجـدي
قال المنى قلت الـتــرف والـســيــاده
ودي بها بـس أنت فــــوق الــتــحـــــدي
قال اش تـبـي قلت الهنـاء والسعاده
يـا ويـنـهـا والـدمـع مــن فـــــوق خــــــدي
قال السـبـب قلت الــطــبــايع قــراده
طبــعـك كــــذا والجـرح ما هــو بـــقــدي
قال الـشعــر قلت اكـتـبـه فــ الوساده
واقـــرا قـصـايد وافـخر بـشـعـر جـــدي
قال الـسـهــر قلت بــعـيـونــي شـهـاده
واللــيــــل يــشــهــد حــافـظٍ كـــــل ســدي
قال الــقـمـــر قلت الـبـلا في بـــعــــاده
ودي بــقـــربـــــه مــيـــر اشــوفـه يــصـدي
قال اتــركــــه قلت اسـتــلــذ بـــوداده
أشـرب جـــروح الــصـد واسـقـيـه ودي
قال الــقــهــر قلت ادري انــي مــــراده
وأدري يــبـــادلــنـي غــــلا فــوق حــدي
دايــم يـعــانــدنــي وامــــــوت بـــعــنــاده
يــجـي مـعـي أحــيــان وأحـيـان ضــدي

2002م

حبيبي لا تــكلمــني ولا تكــــذب علي باعـــذار
ما دام ان الـخـطـا واضـح دخيـلـك لا تزودها
لهيب الــنـار ما يــطـفـى اذا زدتـه بــشـعـلـة نــار
وانـا نــاري تــواقـد بي وعـــذرك ما يــبـــردها
تـحاول تـستــر الدعــوى وزلاتــك عـلي كــبـــار
بـشي شـافـتـه عـيـنـي وجــاني من يــوكــــدهـا
كشفتك بعد ما شفتك وصار اللي علينا صار
زمـانـك بـيـّن الخـافي ولا يــمــديـك تـجــحــدها
تـبــيـن كــل شي عندي قـبـل ما اكمل الـمـشـوار
واعيش بكذبة الـعـشاق واســمـعـهـا وارددها
نـهــايـة حـبـنـا هذي وهــذي حــكمــة الاقـدار
الا يـا خـايـن الــعـشــره جــروحي لا تـجـددها
خـــلاص انسى ليالينا واحـرق بـاقي الـتــذكار
ولا تـنطق حروف اسـمـي ولا حتى تـعــددها
ولا يطري عليك اني أمــوت بـغـيـبـتـك وانـــهـار
تـجـارب دنــيــتي واجــد وقــلبي قـد تــعـــودها
أخيراً روح عن عيني ولا تكـثـر علي أعــذار
تـــراها واصـله عندي رجــيــتــك لا تـــزودها

2002 م

يـوم اللقاء صاحت على جاله جروح
جـتـني مـواعـيد الـهـناء فــي وداعــه
بـيني و بـينك سـر الأشواق مفضوح
قـصـة غــرامٍ مــا بــدت مـن إشـاعه
صمت الشفايف ما قوى لحظة البوح
فــجـر أحـاسـيس الـحـياء بـالـشجاعه
مـا كـنت أظـنك تـسهر الـليل وتـنوح
واثـرك تـحب الـلي غـرامك ضـياعه
بـعد الصراحة وش بقا يا شقا الروح
غـيـر الـوصال الـلي عـرفته قـطاعه
دنـيـا الـهوى مـاهي تـهاويل ومـزوح
وانــتـه وانـــا عـشـنا هـوانـا بـسـاعه
خـــل الـسـعـادة تـقـتل الـهـم وتـفـوح
وخــل الـعـذول الـلـي قـهرنا سـماعه
دام الـلقاء طـابت عـلى شـانه جروح
وش لــي بـجـرحٍ سـبـته مــن وداعـه

2002م

ان نـويـت الـصد قـال الـشوق لـيه
تـبـعـد وقـلـبـك تــولـع فـــي هــواه
وان بغيت القرب شفت الموت فيه
أكــره الـعالم واصـير امـشي وراه
وش أســـوي دامـنـي مـيـت عـلـيه
مــــا ذبــحـنـي يـابـشـر الا غـــلاه
كــل عـرقٍ مـن عـروقي مـشتريه
لــو يـطـول الـوقت مـا قـلبي نـساه
لــي ثـمـان سـنـين غـيـره مـا ابـيه
مـبـتـلي قـلـبـي وهـــو ســبـة بــلاه
كـل مـا جـيت ابـتعد غـصبٍ اجيه
أكــذب ان قـلت الـمحبه فـي سـواه
وان عـزمت الـبعد قـال الـحب ليه
تـبـعـد وقـلـبـك تـعـلـق فـــي هــواه

2001م