مشاعر

20أبريل

الاستمتاع بالحياة.. حتى في أبسط التفاصيل

من الأمنيات اللي ما قدرت أحققها حتى الآن، مع إني أعرف أنها مهمة وبسيطة في نفس الوقت ودايم انصح اللي حولي بها وما وصلت لمرحلة تطبيقها، مثل المدخن اللي ينصح عن الابتعاد عن التدخين.

لكن ما يضر خلّونا نسولف فيها شوي وهي “الاستمتاع بالحياة.. حتى في أبسط التفاصيل” مثل:

  • الاستمتاع بشرب الشاي بدل من تحويله لمهمة تعبي فيها بطنك وتعتبر نفسك أنجزت إذا خلصت الكأس، جرّب وارتشف الشاي أو القهوة بدل الشرب مع التذوق بدون التفكير في أمور خارج دائرة الشاي.
  • اذا لعبت مع طفل صغير ركّز معه واندمج كأن ما فيه في الحياة الا انت وهو، وأبعد عنك أي تفكير أو مواضيع خارج موضوع الطفل اللي قدامك.
  • في وقت الأكل استمتع بطعمه وتفرغ له ولا يصير جنبك جوال أو شاشة تلفزيون أو ناس مزعجين، وعشان يصير للأكل طعم تلذذ به وماهو لازم تكثر ويزيد وزنك وأصير أنا السبب.
  • إذا حولك أشجار أو أحواض ورد استمتع بالنظر لها بهدوء وحرك تربتها ودقق في تفاصيلها، ولو كانت مزرعة بيكون الوضع أجمل ونفس الموضوع مع الحيوانات.
  • عند متابعة مسلسل أو فيلم، تفرغ له وأبعد عنك أي شي يشغلك عنه عشان تندمج معه وتحس بتفاصيله.
  • وهنا نقطة مهمة جداّ وهي الصلاة الحقيقية وتأديتها بخشوع وتفرغ لأنها علاقة اتصال مع الرحمن وفيها روحانية.
  • عند قراءة القرآن تقرأه بتفكر وتأمل وتقرغ له ولا يكون قراءة شفهية فقط.
  • اذا جلست في مكان جميل أبعد عنك كل شي يشغلك عن التمعن والاستمتاع بكل ما هو جميل في المكان.
  • لو شفت قدامك لوحة أو تحفة فنية، استمتع بالنظر لها وتمعن في تفاصيلها وأبحر في معاني كانت في مخيلة الفنان.

ولو تلاحظون الشي المشترك هو التفرغ والتمعن والابتعاد عن كل ما يشغلك عن الاستمتاع باللحظة مهما كانت اللحظة.

13فبراير

شعور هناك..

شعور هناك
في ممشاك
وفي لقيا القمر وياك
على ذكرى الدروب اللي تمشينا
تعالي لي…
نروح هناك
تعالي واسمعي
نبضي ينادي لك
ولو زاد الصخب حولك
تعالي لي
انادي لك
نشوف اللي مضى من وين ودانا
ونسمع ما بقى من ليل اشجانا
ونتنفس ولا نرتاح
عشان نروح..
للغيمة
نروح هناك..
ونصنع من شموخ أوقاتنا قيمة
ومن صمت الزمن للبوح شيمة

الصورة المضافة مع التدوينة لفنان جميل رسمها بحب وسكينة وجدتها في بحر الإنترنت وأضفتها في نفس البحر

16يونيو

بوادر مرحلة الهدوء بعد الـ45

بعد عمر الـ45 صرت أستغرب من اللي يجلس ثلاث ساعات في مكان واحد عشان يلعب بلوت ويستمتع بما يفعل ولو تقول له فلان يبيك ما قدرت تسحبه من مكانه مع اني كنت مثله، وصار يجيني الملل من الجلسة في كوفي مع مجموعة معارف، ولا صرت أحب اني اروح مشوار مع اثنين لمطعم عشان نتعشى فيه، ولا أحرص على كشتات البر مع مجموعة شباب في وقت الربيع مثل زمان أول. أكمل القراءة »

21ديسمبر

حكاية عين خجلانه

1

في لحظات كلام عيونك الخجلانه… اسكت واسمعك .. حتى لو ما ينطق لسانك ….. الحكاية… حكاية حتى لو من عين خجلانه … والمستمع مستحيل يقاطعك لو لحظة لأنه مستمع مستمتع بكلامك … لا تقول نجلس كذا ساكتين … انا قاعد اسمعك لو حتى سنين

لو مرت سنين

وانا قدام عينك

باسمعك..

واسمع كلام العين

وافهمك..

قبل ما تحكين

تكفيني نظرة عين

شكواك بعيونك واضحة

حتى السعادة واضحة

وبكاك دمعه صارخة

وضحكة عيونك جارحة

يكفيني بس اسمعك

وانظر عيونك وافهمك

لو مرت سنين وسنين

انتي حكايات الحنين

10أكتوبر

هي طاهرة..

774-main-view

هي طاهرة

واحساسها طاهر
تنظر لكل الناس بعيون الوفا
هي شاعره
واحساسها شاعر
يكتب عن اللي من غلاها ما اكتفا
منها تعلمت أشتكي
من قل ماهي تشتكي
ومنها تعلمت الحكي
من كثر ما هي صامته
في كل يوم اشوفها
بين الورود
واسمع لبعض حروفها
بين السطور
هي طاهرة
هي صامته

14يوليو

هي حياة…

حياةهي حياة… أصعب شي فيها بعض الظروف اللي تعاكسنا بدون مقدمات وأحلى شي فيها ذيك اللحظات الجميلة اللي تجينا بدون تخطيط.

هي حياة… يلبس هذاك ثوب الطهر ومنظر التقوى ويصبح التقي ويصير القدوة، اما هذا مشكلته من شكله انه مذنب وعشان نسد الذرايع نتهمه بتهمه يمكن تصيب.

 هي حياة… فيها الشهوة نزوة.. (تم حذف بقية النص) 

هي حياة… يمكن تشوف غيرك فيها محقق أهدافه بدون تعب وفي المقابل تلقى ثاني تعب ولا لعب ولا حقق شي، يمكن مقادير أو نصيب لكن الأكيد واللي راح يطمن خوينا ابو تعب ان العبرة في النهاية على الأقل يمكن يموت مرتاح.

هي حياة… تحب وتقول انك لقيت اللي تبيه فيمن تحب وتحس باحساسه الصادق وفي وقتها يمكن تحلف بانه صادق، لكن رياح الوقت ما تضمن لك شي… وحبيب اليوم بكره يمكن يكون شخص عادي… قصدي انت تصير عنده شخص عادي.

فيصل الصويمل

10يناير

العيون الجميلة

لبى خدودك والعيون الجميلة
لبى ممات في حياة بلياك
اهلا هلابك يالغلا يالأصيلة
جيتي على عهد مع اللي تحراك
جيتي فرح
جيتي شقا
جيتي هناك
جيتي مكان يجمع الجرح فيني
ذاك المكان اللي جمعني برؤياك
ذكرى قديمة في سنين طويلة
اهلا هلا بك ياغلاي الأصيلة
ماني بقايل وش جرا
ماني بقايل وش حصل
يكفيك اقول
اعشقك واتمناك
لو هي ثمان سنين
معها ثلاث شهور
لو هي جروح أحباب
معها العتب مقدور
لو هي حياة أغراب
لو هي بدون أسباب
ماني بقايل شي
اهلا هلا بك يا هواي الأصيلة
ياللي تركتيني جفا مدري عناد
مدري هجرتيني وفا كله بعاد
الا على طاري السنين
وطاري الزمن بعد الحنين
انتي مثل ما انتي قمر
كل حلا ما تكبرين
حتى لو انك كبرتي
تكبرين وتزينين
لبى خدودك والعيون
كلك حلا
كلك حلا
تكبرين وتزينين

فيصل الصويمل

22سبتمبر

شامخ شجر

شامخ شجر
مدري ورق ويتساقط
والا طموح بعين طفل ودكتور
بين اصفرار الوقت
هابط ولاقط
وبين الدقايق
مابقى شخص معذور
هذاك ناجح
وذاك مقهور
وذا سمّوه
فاشل وساقط
طعم التحدي ظلم
ولون الهنا محظور
وياحظ من يسلم
من يد مانعدم
ذيك الهديه غير
ودرب النجاه اظلم
ياحبنا
للي يقول احلا
هذا غدا مشهور
لو دربنا
أمرض ابو مقهور
يبغى ابن دكتور
لو دربنا
كله هلاك وجور
ياحزن
ياسرور
مدري اقول الطايشين
والا اقول التايهين
والا اقول المدمنين
بس الاكيد
ان الخطا في دربهم واضح
هل من مزيد
نار تبيهم أجمعين
شرارها حبة ولع
هي تجربه لاهل الدلع
لكن نهايتها جروح
وهدم لصروح
وفقد لطموح
جاني وقال ابغى ريال
ثوبه مقطع متسخ
وانا اذكره سيد الرجال
عاقل بهرجه متزن
قلت اش بلاك
اشبك يا ناصر وش حصل
قال انا ناصر سعد
قلت ونعم
بس استريح
قال استريح أو استعد
انا ترى ناصر سعد
كنت اشتغل بالمغسله
واحكم امم
واغسل هدوم
واقتل امم
واسهر وانوم
وارفع علم
واحمل هموم
عطني ريال
ابغى حلاوه يافهد
قلت ياربي تعين
هذي نهاية مدمنين
او تايهين وطايشين
والله قهر
شبابنا راحو هدر
راحو ضحيه للسهر
لا واحسافه ياورق
شامخ شجر
شامخ شجر
ماعاد باقي به ورق
كله تساقط وانتثر

© جميع الحقوق محفوظة 2020
website https://www.trimmeradviser.com/